عه‌بادى ده‌ڵێ: ده‌بێت په‌كه‌كه‌ له‌ شنگال نه‌مێنێت و يه‌ڵدرم ده‌ڵێ: له‌گه‌ڵ عێراق له‌سه‌ر كشانه‌وه‌ى هێزه‌كانمان له‌ باشيك رێككه‌وتين

image

له‌ ميانى كۆنگره‌يه‌كى رۆژنامه‌وانييدا هه‌ريه‌ك له‌ سه‌رۆك وه‌زيرانى عێراق و توركيا جه‌ختيان له‌سه‌ر نه‌مانى په‌كه‌كه‌ له‌ شنگال كرده‌وه‌.

له‌و باره‌يه‌وه‌، سه‌رۆكى حكومه‌تى عێراق حه‌يده‌ر عه‌بادى گوتى: "عێراق داواى له‌ په‌كه‌كه‌ نه‌كردووه‌ بێته‌ ناو عێراق و رێككه‌وتن له‌ نێوان هه‌رێم و به‌غدا هه‌بووه‌ كه‌ هێزى هاوبه‌ش كۆنترۆڵى ناوچه‌كه‌ بكات و رێككه‌وتنى كۆتايش ئه‌وه‌يه‌ كه‌ نابێت هيچ هێزێك له‌ ده‌ره‌وه‌ى هێزه‌كانى عێراق له‌ شنگال هه‌بێت".
له‌ به‌رامبه‌ريشدا سه‌رۆك وه‌زيرانى توركيا بن عه‌لى يه‌ڵدرم گوتى: "داوامان كردووه‌ عێراق هاوكارمان بێت له‌وه‌ى په‌كه‌كه‌ له‌ شنگال بچێته‌ ده‌ره‌وه‌ و عێراقيش به‌ڵێنى داوه‌ كه‌ هه‌موو هه‌وڵێكى خۆى بدات بۆ نه‌هێشتنى په‌كه‌كه‌ له‌ شنگال".
گوتيشى: "ئێمه‌ تيرۆر به‌ تيرۆر ده‌ناسێنيين و په‌كه‌كه‌ تيرۆريسته‌ و سووپاسى سه‌رۆك وه‌زيرانى عێراقيش ده‌كه‌ين كه‌ له‌ هه‌ستيارى ئێمه‌ بۆ پرسى تيرۆر و په‌كه‌كه‌ تێده‌گات".
هه‌روه‌ها سه‌رۆك وه‌زيرانى توركيا رايگه‌ياند، به‌غدا و ئه‌نقه‌ره‌ له‌سه‌ر كشانه‌وه‌ى هێزه‌كه‌ى توركيا له‌ باشيك رێككه‌وتوون.
سه‌رۆك وه‌زيرانى توركيا بن عه‌لى يه‌ڵدرم،رايگه‌ياند: "عێراق و توركيا رێككه‌وتن له‌سه‌ر كشانه‌وه‌ى سوپاى توركيا له‌ باشيك."
هێزه‌كانى سوپاى توركيا له‌ نزيك باشيكى سه‌ر به‌ مووسڵ سه‌ربازگه‌يه‌كيان دامه‌زراندووه‌ و له‌ ساڵى رابردووه‌وه‌ تێيدا جێگير كراوون.
توركيا پێداگيرى له‌سه‌ر به‌شداريكردن له‌ شه‌ڕى مووسڵ ده‌كرد، به‌ڵام حكومه‌تى سه‌رۆك وه‌زيران حه‌يده‌ر عه‌بادى رێگه‌ى نه‌دا توركيا به‌شدارى له‌و شه‌ڕه‌دا بكات.