كێ كۆنگرەی نەتەوەیی دواخست

image

ئاریان فەرەج

لە هاوینی 2013دا، بە بانگهێشتی سەرۆك بارزانی و لە زەمینەیەكدا كە لانی كەمی لێكگەیشتنی تێدا فەراهەم بوو، حزبەكانی هەر چوار پارچەی كوردستان بۆ ئامادەكاریی كۆنگرەی نەتەوەیی، لە هەولێر دەستیان بە كۆبونەوە كرد. 

روانگای پارتی ئەوەبوو كۆنگرەكە نەتەوەیی بێت نەك كۆنگرەی ئەحزاب، بە پێویستیشی زانی بۆ ئەوەی وێنەكە كامڵ بێت، نوێنەری پێكهاتەكانی دیكەشی تێدابن، ئامانجیش لە كۆنگرەكە كە سەرۆك بارزانی دەورێكی میحوەریی لە ئامادەكارییەكانیدا بینی، یەكخستنی خیتابی بزوتنەوەی رزگاریخوازیی كوردستان و پێكهێنانی ناوەندێكی یەكگرتووی هاوچەرخ بوو كە بتوانێ بەرخورد و گفتوگۆ لەگەڵ نێوەندە جیهانییەكان بكات و دۆست و پشتیوان بۆ ئامانجەكانی كورد پەیدا بكات، وەك چۆن زۆر لەمیللەتان ئەوکارەیان کردووە کەجیا لەحزب و کەسایەتی و ڕابەرەکانیان، ئەوجۆرە ناوەندەیان هەبووە و توانیوایە ڕۆڵی زۆر کاریگەر بگێڕن. بۆیەش نەدەكرا ئەو کۆنگرەیە لەسەر بنەمای ئایدۆلۆژیاو پاوانکردن بێ و دواتر بەکاربهێنرێ لەدژی یەکتر، چونکە ئامانج لە بەستنی کۆنگرە ئەوە نەبوو کە حزبێک یان ئایدیۆلۆجیایەك زاڵ بێت. 

لە راستیدا بەشێک لە یەکێتی و گۆران كە ئێستا پارتی بە دواخستنی كۆنگرەكە تۆمەتبار دەكەن، هەر لە سەرەتاوە ڕای جیاوازیان هەبوو، لەڕاستشیدا گۆڕان هەر دژی بەستنی کۆنگرەی نەتەوەیی بوو و بەکارێکی زیادەی دەزانی، لەباری ئامادەکارییەکانیش بۆئەنجامدانی کۆنگرە، لێژەنەی ئامادەکاریی گەیشتبوون بەو پیشنیارەی کە هەر پارچەیەکی کوردستان پێنج نوێنەری هەبێت بەبێ ئەوەی بیر لە هاوسەنگی حزبی بکرێتەوە کە کامە حزب لەکامە حزب زیاترە، بەڵام پەکەکە دەیویست ئەو پرسە بگۆڕێت بەئاقاری ئەوەدا کە ببێتە کۆنگرەی زاڵ بوونی پەکەکە بەسەر کۆنگرەی نەتەوەیدا و لەکۆتایشدا ئەو سیاسەتەی کە ئیستا لە ڕۆژئاواو و باکوور هەیانەو ئەو خراپەکارییەی لەباشور دەیانەوێت بیکەن، لەناو کۆنگرەشدا بیکەن.

وەکو چۆن گۆڕان پەرلەمانی وەرگرت و کردیە دژی حکومەتی کوردستان و پیشمەرگەو سەربەخۆیی، پەکەکەش بەهەمان نیاز دەیویست کۆنگرەیەکی نەتەوەیی هەبێ و بۆ ئامانجەکانی خۆی بەکاری بهێنێت. هەر بۆیەش پیشنیاری دەکرد دانیشتوانی هەر پارچەیەکی کوردستان دەبێت ڕۆڵیان هەبێ لەوەی کە نوێنەرەکانیان چەند بن لە ناو کۆنگرەدا، ئامانجیشی ئەوە بوو کە خۆی و حزبە دروستکراوەکانی، ببنە زۆرینەی كۆنگرە. پەکەکە دەیویست خۆی بکاتە بنەماو خاوەنی کۆنگرەی نەتەوەیی و هەوڵێکیشیان هەبوو کەپێشتر بەتەنیا لە ئەوروپا کۆنگرەیەکیان بەستبوو، بیکەن بە بنەمای ئەو کۆنگرەیەو حزبەکانی هەر چوار پارچەی کوردستانیش ناچار بكەن هەمان شت بە ئارەزووی پەکەکە دووبارەبکەنەوە.

بۆ مێژوو، ئەوە پەکەکە بوو، بووە هۆی دواخستنی کۆنگرەی نەتەوەیی کورد، ئەوە ئەوان بوون کە دەیانویست کۆنگرەی نەتەوەیی پاشکۆی سیاسەتیان بێت، ئەوانەش كە ئێستا دەیانەوێ ڕاستەیەکان هەڵگێڕنەوە، هەر هەمان ئەوانەن كە دژی سەربەخۆیی كوردستان و بەرەی سەربەخۆییخوازانن و بۆیەش مەگەر هەر خۆیان بڕوا بە خۆیان بكەن كە گوایە خەمخۆری كۆنگرەی نەتەوەیین!. 

هەر تاكڕەوی و پاوانخوازی و دۆگمایی پەكەكە بوو، ئامادەسازییەكانی كۆنگرەی پەكخست، ئەوانەش كە ئێستا بۆ پێخۆری میدیایی و كەمكردنەوە لە هەڵوێستە نەتەوەییەكانی پارتی و سەرۆك بارزانی، ئەم ناهەقییە دەڵێن، ئەگەر راست دەكەن و خەمخۆری نەتەوەی كوردن، خۆ دەبێ سەربەخۆییخوازبن، نەك دژە سەربەخۆیی، خۆ دەشبێ بە لانی كەمەوە بایی ئەوەندە تێبگەن كە كۆنگرەی نەتەوەیی بۆ ئەوەی جیهان ئاوڕی لێ بداتەوە و ئامانج بپێكێ، دەبێ هاوچەرخ و هاوسەنگ و پڕ لە لێبوردەیی و فرە رەنگیی و دوور لە دەمارگیری و پاوانخوازی و خۆسەپاندنی حزبی بێت.