سەرۆكی بارزانى: پارتی، توانی تاكی كورد بگەینێتە ئاستێك كە باوەڕی بەخۆی هەبێت

image

به‌ چاودێرى و ئاماده‌بوونى سه‌رۆك مه‌سعوود بارزانى و سكرتێر و ئه‌ندامانى مه‌كته‌بى سیاسى و ئه‌ندامانى ئه‌نجومه‌نى سه‌ركردایه‌تى پارتى، له‌شارى هه‌ولێر، ئه‌كادیمیاى پارتى ڕێوڕه‌سمى ئاهه‌نگى ده‌رچوانى خولى هه‌ژده‌هه‌مین و ده‌ستپێكردنى خولى نۆزده‌هه‌مینى رێكخست .

له‌ رێوره‌سمه‌كه‌دا قادر قه‌چاخ سه‌رۆكى ئه‌كادیمیاى پارتى له‌ وته‌یكدا پیرۆزبایى ده‌رچوونى له‌ به‌شداربووانى خولى 18 كرد و به‌خێرهاتنى به‌شدارانى خولى 19ى كرد و بوون و به‌رده‌وامیى ئه‌م خولانه‌ى به‌گرنگ و پڕبایه‌خ لێكدایه‌وه‌.

دواتر سه‌رۆك بارزانى له‌ وته‌یكدا، وێراى پیرۆزبایى له‌ 58 قوتابى ده‌رچووى خولى هه‌ژده‌هه‌مین، هاوكات بوونى ئه‌كادیمیاى پارتى به‌ ده‌ستكه‌وتێكى مه‌زن لێكدایه‌وه‌ و هیواى سه‌ركه‌وتنى بۆ به‌شداربووانى خولى نۆزده‌هه‌مین خواست.

وتاره‌كه‌ى سه‌رۆك بارزانى له‌سه‌ر چه‌ندین بابه‌تى وابه‌سته‌ به‌ پێگه‌یاندنى كادیران و به‌هێزكردنیان به‌ چه‌كى زانست و مه‌عریفه‌ هه‌ڵوه‌سته‌ى كرد و مێژوى دوێنێى و ده‌ستكه‌وته‌كانى به‌سته‌وه‌ به‌ ئه‌مرۆى هه‌رێمى كوردستان و گه‌شه‌و په‌ره‌سه‌ندنه‌كانى هه‌رێم، بارزانى له‌وتاره‌كه‌یدا گوتى ئێمه‌ قه‌رزداى خه‌بات و قوربانیدانه‌كانى جه‌نابى بارزانى نه‌مر و شۆرشى ئه‌یلولین، چونكه‌ له‌دایكبوونى پارتى و دواتریش خودى شۆرشى ئه‌یلول له‌و كاتانه‌دا بوون كه‌ هه‌موو دوژمنان كاریان له‌سه‌ر بێ ئومێدكرنى كوردان ده‌كرد، به‌ڵام بارزانى نه‌مر به‌ دامه‌زراندنى پارتى دیموكراتى كوردستان و به‌شداریكردنى له‌ كۆمارى كوردستان و ڕێڕۆیشتنه‌ مێژژوییه‌كه‌ى بۆ یه‌كێتى سۆڤیه‌تى جاران و په‌ڕینه‌وه‌یان له‌ ئاراس مێژووێكى گه‌شیان تۆماركرد.

هه‌روه‌ك گوتیشى كه‌ پارتى وه‌كو حزبێكى كوردستانى و نه‌ته‌وه‌یى و نیشتیمانى كارى له‌سه‌ر به‌هێزكردنى باوه‌ر و متمانه‌ و پشتبه‌خۆبه‌ستنى تاكه‌كانى كورد كردوه‌، ڕوو به‌ ئاماده‌بووان و ده‌رچووانى خوله‌كه‌ش سه‌رۆك بارزانى گوتى ئه‌ركى ئێوه‌ ئه‌ركێكى قورس و گرنگه‌ و ده‌بێ زیاتر بچنه‌ نێو چین و توێژه‌كانى كۆمه‌ڵگه‌ و هێزى نه‌ته‌وه‌په‌روه‌رى و باوه‌ربه‌خۆبوون له‌ نێویاندا قوڵتر و تۆكمه‌تر بكه‌ن به‌تایبه‌تیش بۆ ئه‌و جیل و نه‌وه‌یه‌ى كه‌ له‌ دواى راپه‌رینه‌وه‌ له‌دایك بوون.

له‌ كۆتایى رێوره‌سمه‌كه‌شدا له‌لایه‌ن سه‌رۆك بارزانى و به‌شێك له‌ ئاماده‌بووانه‌وه‌ خه‌ڵات به‌سه‌ر ده‌رچوانى خولى هه‌ژده‌هه‌مینى ئه‌كادیمیاى پارتیدا دابه‌شكرا.
:ئه‌مه‌ش ده‌قی وتارى سه‌رۆك بارزانییه‌

بەناوی خودای گەورە مهرەبان
ئامادەبوانی بەرێز. خوشك و برایانی خۆشەویست. هەڤاڵانی تێكۆشەر.
بەختەوەرم ئەمڕۆ لەگەڵ ئێوە دا لەو بۆنە دڵخۆشكەرەدا، ئامادە بوومە لەسەرەتاوە دەمەوێت سوپاسی گەرمی ئەو مامۆستا بەرێزانە بكەم، كە خۆیان ماندوو كردووە و ئەو خولەیان بەسەركەوتوویی كۆتایی پێ هێنا، كە كۆمەڵێك لاوای كادیری پارتیان پێگەیاند، هەروەها سوپاسی بەرپرس و ستافی ئەكادیمیا دەكەم بۆ ماندووبونیان و سوپاسی قوتابیانی بەرێزیش دەكەم، كە خۆیان ماندوو كردووە و تا بەزانستێكی تازە بگەرێنەوە مەیدانی خەبات و بەسەركەوتوویی دەست بە خەبات و تێكۆشانی خۆیان بكەن.
خوشك و برایانی بەرێز. ئەم ئەكادیمیە دەسكەوتێكی گەورەیە، ئێمە زۆر بایەخی پێ دەدەین، دەبێ بەهەموو شێوەیەك پشگیری بكرێت بۆئەوەی بتوانێ بەردەوام بێت لە ئەركەكانی، چونكە لە قۆناغی ئێستادا

پێویستیمان بە كادیری وا هەیە، كە چەكدار بێ بەزانستی تازە، چۆن جاران ئێمە خولمان بۆ پێشمەرگەكان دەكردەوە، كە چۆن فێری تۆپ و وئارپێچی و چەكی دژە ئاسمانی بن بۆئەوەی بزانن چۆن بەكاری دەهێنن و بەرگری لە وڵاتەكەیان بكەن. ئێستاش پێویستیمان بەوەیە ئەم كادیرانە فێر بن چۆن رووبەرووی هەموو ئەو تەحدیاتانە دەبنەوە، چۆن خزمەتی گەل و نیشتمانەكەیان دەكەن، چۆن بیروباوەر و هزری پارتایەتی و رێبازی بارزانی بۆ خەڵك و بۆ هەموو گەلی كوردستان شیدەكەنەوە.

بۆیە من لەو بڕوایەدام، كە سەركردایەتی پارتیش گرنگی زۆر دەدات بەو ئەكادیمیایە.

من زۆر بەگەرمی پیرۆزبایی لەو كادیرانە دەكەم، كە خولی 18مینیان تەواو كردوو و داوای سەركەوتنیش دەكەم بۆ ئەو كادیرانەی كە دەست بە خولی 19 دەكەن، پارتی هەر لە سەرەتاوە هەستی بە گرنگی ئەو ئەكادیمیە كردووە. لە شۆرشی ئەیلول، لە شۆرشی گوڵان، هەمیشە ئەم خولانە بەردەوام بوونە، ئەو وەختە خولەكان لە ژێر چادر یان لەناو ئەشكەوت یان لەبن دار بەرووێك بوون بۆ ئەوەی بوردومان نەكرێن، بە فرۆكە بە تۆپخانە، دەبوو هەموو ئامادەیەك بكرێت وەكو ئێستا نەبوو ئەو دەرفەتەی ئێستا هەیە ئەو وەختە ئەو بوارە نەبوو، بەڵام هەموو شتێك لە كەمەوە دەست پێدەكات، ئینجا گەورە دەبێت.

سوپاس بۆ خوا ئێستا ئێمە دەبینین نەك هەر پارتی، بەڵكو هەموو كوردستانی خۆشەویست هەمووی هەر لە گەشەسەندن دایە و لەهەموو روێكەوە بەرو پێشچوون دەچێت. لەگەڵ رێزم بۆ رۆڵی هەموو تاكێكی ئەم گەلە و هەموو حزبێك كە خەباتی كرد بێت، بەڵام نەك لەبەر ئەوەی ئەوە شوێنێكە هەموو كادیری پارتین، منیش وەك ئەندامێكی پارتی، كە بەشانازیەوە ئەندامێكی ئەو حزبەم، پێموایە ئێمە دەبێت بە نمەك بین بەرامبەر بەم حزبە و بەرامبەر بە دامەزرێنەری ئەم حزبە. ئەم پارتە، لەكاتێك دامەزرا كە بزاڤی رزگاریخوازی كوردستان و گەلی كوردستان بەتێكڕاییی تووشی نائومێدیەكی وا ببوو، كە مەترسی تواندنەوە هەبوو، دوای جەنگی دووەمی جیهان، دوای زنجیرەیەك شكست، كە بەسەر بزوتنەوەی رزگاریخوازی كوردستان داهات لە كوردستانی باكور، لە كوردستانی باشور، لە ڕۆژهەڵات لە رۆژئاوا، لە هەموو شوێنێك شۆرشی شێخ عبدولسەلام بە ئاسن و ئاگر نەیانهێشت سەركەوێت و شێخ عبدولسەلام شەهید كرا، شۆرشی شێخ سەعید، نەیانهێشت سەركەوێت شەهیدیان كرد، شۆرشی شێخ محمود، نەیانهێشت بەئاگرو ئاسن سەركەوێت، دیسان نەفیكرا، شێخ ئەحمەدی مەزن چواردە ساڵ لە زیندان دەست و پێی بەزنجیری لە بەندیخانەكانی رژێمی عێراقدا بۆ ئەوەی یەك وشە بنوسێت داوای لێخۆش بوون بكات، داوای نەكرد و قبوڵیشی نەكرد.

لە كوردستانی ڕۆژهەڵات یەكەم سەرۆكی كۆماری كوردستان لە سێدارە درا و شەهید كرا، ئیتر چەندی بڵێیت تەواو نابێت، ئەوە چیرۆكێكی دوور و درێژە، بەڵام دروست بوونی پارتی و دامەزراندنی پارتی نەیهێشت ئەم بێئومێدیە، ئەم شكستانە ببنە ئەمری واقیع، بەلای كەمیەوە ئومێدێكی هێشتەوە، تروسكەیەك ئومێدی لەدڵ و دەرونی هەموو كوردێكی نیشتیمان پەروەر دا هێشتەوە. چوونی بارزانی بۆ یەكێتی سۆڤیەت، ئەو جارە ئێمەی كورد چونكە بێ دەسەڵات بووین، بێ دەرفەت بووین، نەمانزانی ئەگینا رێڕۆیشتنێكە و هەرگیز دووبارە نابێتەوە، پێشتر نەبووە و دووبارەش نابێتەوە، 53 رۆژ بەشەڕ لەگەڵ سوپای چەندین دەوڵەت، ئینجا خۆ بگەینە بە شوێنی مەبەست.

ئەمە كارێكی ئاسان نەبوو، ئەم سەروەریانە هەمووی پارتی بوو بە خاوەنی، ئەوە هەمووی خۆی لە پارتی دا دیتەوە و پارتی وایكرد كە گەلی كورد لەهەموو پارچەكان بە ئومێد بێت، نابێ تووشی نائومێدی ببێت، دەبێـ ئێمە بە هیوا بین، رۆژێكمان هەر لێ هەڵدێت، تا ئەوە بوو ئیتر شۆڕشی 14تەمووز لە عێراق دەستی پێكرد و لەوێ پەنجەرەیەك یان دەرگایەك كرایەوە جەنابی بارزانی گەڕایەوە، شێخ ئەحمەدی مەزن لە زیندان دەرچوو، گەلی كورد جارێكی تر هیوایەكی تر، ئومێدێكی بۆ پەیدا بوو. نامەوێت بچمە ناو ئەو وردەكاریانە، بەڵام شۆڕشی ئەیلوولیش دەستی پێكرد، بۆیەكەمجار پارتی بەسەركردایەتی بارزانیی نەمر شۆرشێكی بەرپاكرد، كە بە راستی دەتوانین بڵێین شۆرشێكی نەتەوەیی بوو، لەسەرتاسەری كوردستان، پێشتر شۆرش دەبوو، لەبارزان و دەوروبەری بارزان چەند دەڤەرێكی تر،خاپۆر دەكرا، لە سلێمانی دەستی پێكرد هەر لەو ناوچەیە دا مایەوە، لە دێرسیم دەستی پێكرد، هەر لەوێدا مایەوە، نەبوونە شۆڕشێك، كە هەموو كورد پشتیوانی لێ بكات، شۆرشی ئەیلول بۆ یەكەمجار بوو بە شۆڕشێك لە كوردستانی باكور، لە رۆژهەڵات لە رۆژئاوا لەناو كوردستانی باشوور، ژن ئاڵتونی خۆیان دەفرۆشت و بۆ شۆڕشیان دەنارد.

شۆڕشێك بوو بەراستی شۆرشێكی نەتەوەیی و گەلی كوردستان لە پشتی بوو. ئەمەش سەروەریەكی زۆرە گەورەیە بۆ ئەمڕۆی پارتی، بەڵی شۆرشی ئەیلوول توشی نسكۆ هات، چونكە پیلانی گەروە لە شۆرش كرا، زۆر راستی هەیە وەختی دێت هەموو شتێك بۆ هەموو لایەك روون ببێتەوە، بەڵام بۆ یەك ڕۆژیش شۆرش نەوەستا، شۆڕشی گوڵان دەستی پێكردەوە، بەڵام كە شۆرشی گوڵان دەستی پێكردەوە مانای وا نییە لە 26 گوڵان دەستی پێكرد، شۆڕش پێشتر ئامادەكاری بۆ كرابوو، لە 26ی گوڵان یەكەم تەقە كراو، یەكەم شەهیدمان دا، كە سەید عەبدوڵا بوو، پارتی توانی تاكی كورد بگەینێتە ئاستێك كە باوەری بەخۆی هەبێت، چونكە بەلای منەوە ئەمە گەورەترین دەسكەوتە، سەردەمێكمان بەسەر دا تێپەری، خەڵك شەرمی دەكرد بڵێت من كوردم، هەندێك نەیان دەوێرا بڵێن ئێمە كوردین، بەڵام كە شۆڕشی ئەیلول دەستی پێكرد، زۆر كەس رەنگە نەنكی كورد با یان رەچەڵەكێكی كوردی هەبوایە، دەگەڕایەوە، بۆ بنەچەی خۆی و شانازی دەكرد دەیگووت: من كوردم، بەلای منەوە ئەو بڕوابەخۆ بوونە گەورەترین دەسكەوت بوو.

ئەركی پارتی ئەركێكی قورسە، من جارێكی تریش دەڵێم رێزم هەیە بۆ هەموو حزب و لایەنەكان، بەڵام رەنگە ئێوەش ئەگەر بە دیقەت سەیری رابردوو بكەن، سەیری ئێستاش بكەن گۆڕانكاری، كە بەسەر بارودۆخی كوردستان دێت بە بڕیاری پارتی ئەو گۆڕانكاریە دێت. بۆیە پارتی دەبێت هەنگاوی خۆی زۆر بە حەكیمتنە بهاوێژێ، دەبێت بەرچاوی روون بێت، كەبەرچاویشی روونە، بەڵام پارتیش پێویستی بە كادیری زاناو لێهاتوو هەیە، ئێوەن كە چەكی دەستی پارتی، ئێوەن، كە پەیامبەری ئەو پەیام و ئەو رێبازەن.من ئومێدەوارم هەموومان بگەڕێینەوە بۆ ئەو پرەنسیپەی كەپارتی لەسەری دامەزراوە، چونكە ئێمە بەو پرەنسپە خۆمان بەرامبەر بە هەموو شاڵاوەكانی دوژمنەكانمان راگرت، زۆر خۆشە، كە دەبینم كوردستان بەو شێوەیە ئاوەدانە، گوزەرانی ژیانی خەڵك باشترە، بەڵام لە ڕاستیدا پرەنسپ لەسەرووی هەموو ئەو شتانەیە، ئەگەر ئێمە ئەو پرەنسپە لەدەست نەدەین، ئەم وەزعە ڕۆژ بە ڕۆژ باشتر دەبێت، بەڵام ئەگەر ئێمە وازمان لەو پرەنسپە هێنا ئەوەی هەشمانە نامێنێت.

هەڤاڵانی بەرێز. ئەركی ئێوە ئەوەیە كە ڕۆژانە لەگەڵ جەماوەری كوردستان دا لە پەیوەندی دابن و داكۆكی لە هزری نەتەوەیی بكەن، هزری نەتەوەیی نەك بەو مانایەی كە بۆنی رەگەز پەرستی لێبێت، هزری نەتەوەیی لەسەر بنەمای دیموكراسی و مافی مرۆڤ و پێكەوەژیان، لەسەر بنەمای ئازادی، لەسەر هەموو ئەو بنەماكانی، كە ستانداردی جیهانین بۆ ئەوەی مامەڵە لەگەڵ یەكدیدا بكەن. ئێمە بەوە دەتوانین خەڵكی خۆشمان بەرێكوپێكی بە مێشكێكی كراوە پەروەردە بكەین، بەڵام بەراستی ئەگەر بیری نەتەوەیی هزری نەتەوەیی نەچەسپێت لەناو لاوانی و گەنجانی ئێمە دا، تۆ كە خۆشەویستیت بۆ وڵاتی خۆت نەبێت بۆ خاكی خۆت نەبێت، بۆ نیشتمانی خۆت نەبێت شتی تر چ نرخێكی هەیە؟ من جارێك لە دیمەشق بەرپرسێكی بەرزی فەلەستینیم بینی، ئەوها قسەمان دەكرد، لە وەزعی خۆیان زۆر موتەئەسر بوو، پاشان پرسیاری كرد گووتی: وەزعی ئێوە چۆنە؟ منیش پێم گووت: وەزعی ئێمە وایە، پێشمەرگە وایە، بەم شێوەیە.

ئەمە پێش شەڕی ئەنفال و هەڵەبجە و كیمیاباران بوو. گووتی: من كوردم خۆشدەوێت، زۆریش كوردم خۆشدەوێت، چونكە گەلێكی قارەمانە، بەڵام من وەكو برایەك وەكو دۆستێك یەك ئامۆژگاریت دەكەم،، گووتی: بشمرن لەسەر خاكی خۆتان بمرن. گووتی: چونكە ئێستا ئێمە ئەگەر بمرین نازانین قەبری ئێمە لەكوێ دەبێت، چونكە خاكمان نییە، بەڵام ئێوە بشمرن لەسەر خاكی خۆتان بمرن، چونكە لایەنیكەم وڵاتی خۆتانە، لەبەر ئەوە وڵاتی خۆتان بەجێ نەهێلن، هەرچی بەسەرتان دێت با وەكو ئێمەتان بەسەر نەیێت. بێگومان منیش ئەو ئامۆژگاریەم وەكو كەسێكی دڵسۆز و دۆستی كورد وەرگرت، فیعلەن ئەگەر مرۆڤ وڵاتی نەبێت هیچ نییە، هەرچی هەشت بێت قیمەتی نییە، تۆ وڵاتت هەبێت شتی تریشت نەبێت ڕۆژێك هەر بۆت دەبێت .

دەبێت رێز لە مێژووی نەتەوەكەمان بگرین، دەبێت رێز لە سمبولەكانمان بگرین دەبێت رێز لەو خەباتە بگرین، دەبێت رێز لە پێشمەرگە بگرین، ئەو دۆخەی ئێستا بەخوێنی دەیان هەزار شەهید دروست بووە، بە فرمێسك دروست بووە، بەخوێن دروست بووە. هەژاری نەمر شیعرێكی هەیە، كە دەڵێ: مردن لەكوێی ژیان كوشتمی. سەد ڕۆژی وا بەسەر پێشمەرگە دا هاتووە، چونكە بەراستی تەمەنای كردووە بمرێت چونكە ژیانەكە ئەوەندە سەخت بووە، یانی تەمەنای مردنی كردووە بۆ ئەوەی لەدەست ئەو ژیانە ناخۆشە رزگاری بێت.

بێینە سەر هەندێك خاڵی تر، هەروەكو دەزانن دوای هەڵبژاردن، لێرەدا بە پێویستی دەزانم سوپاسی هەموو هەموو هەڤاڵان و ئەندامان و لایەنگران و دۆستی پارتی بكەم بۆ بەشدار بوونیان، كە هیمەتەیان كرد، بێگومان ئێوە و ئێمەش حەزمان دەكرد زۆر لەوە زیاتر بوایە چونكە بە راستی پارتی دەبوایە لەوە زیاتر بێت، بەڵام هەرچۆنێك بێت گرنگ ئەوەیە كوردستان سەركەوت لەو هەڵبژاردنە، ئەوە گرنگە. پارتی هیچ كاتێك دروست نەبووە بۆ ئەوەی دەسكەوت بۆ خۆی بەدەست بهێنێت، پارتی دروست بووە بۆ ئەوەی دەسكەوت بۆ گەلی كوردستان بەدەست بێهێنێت، پارتی دروست نەبووە بۆ ئەوەی خەڵكی تر نەبێت، رەنگە زۆر خەڵكی تر دروست بووە بۆ ئەوەی پارتی نەمێنێت، بەڵام پارتی ئەو حەساسیەتەی بەرامبەر بەكەس نییە.

ئێستا گفتوگۆیەكان دەستیان پێكردووە، وەكو پارتی كاك نێچیرڤانمان ڕاسپاردووە بۆ دروست كردنی كابینە، وەفدی پارتیش لە دوێنێوە دەستی كردووە بە دانوستاندن لەگەڵ لایەنەكانی تر، لەگەڵ هەموو لایەنەكان گفتوگۆ دەكرێت، ئینجا بابزانین، حەقیقەت ئێستا زووە مرۆڤ بتوانێت بڵێت چۆن دەبێـت و چ دەبێ؟ ئێمە ڤیتۆ لەسەر كەس دانانێین، بەڵام ئیبتزاز ومەرجی كەسیش قبوڵ ناكەین، جارێ دەبێت چاوەڕوان بین بزانین ئەو گفتوگۆیانە بە كوێ دەگات.

سەبارەت بە بەغدا، بێگومان لەگەڵ بەغداش جارێ هیچ ناكرێت تاكو هەڵبژاردنی مانگی چواری ساڵی داهاتوو، بارودۆخەكە وایە، چوونی من بۆ بەغدا دوای ئەوەی كە مالیكی هات بۆ هەولێر، منیش چووم بۆ بەغدا، بۆ ئەوەی تەفسیراتی تر نەكرێت، دەنا لەڕاستی دا وانیە كە بڵێین شتێكی وا كرابیت، بڵێین ئەو خاڵە جێبەجێ كراوە، باوەریش ناكەم لەو دۆخەی حكومەتی عێراق بتوانێت شتێك بكرێت تا هەڵبژاردنی داهاتوو، ئینجا با بزانین هەڵبژاردنی داهاتوو چۆن دەبێت، بەڵام بەداخەوە رەوشی ئەمنی عێراق بەرەو داڕمانێكی تەواو دەچێت. بەخۆتان هەمووی دەبینن لە رێگای راگەیاندنەكاندا رووداوی دڵتەزێن هەیە، ئەم خەڵكە گوناحە، بەڵام ئیتر بابزانین تا هەڵبژاردنی داهاتوو بە تەئكید ئەو نەخشە سیاسیەی ئێستا لە عێراق هەیە گۆڕانی بەسەر دادێت.

لەبارەی كۆنگرەی نەتەوەیی. ئەمە هەنگاوێكی زۆر گرنگ و پیرۆزە، هەموو كەس پێی هەڵساوە، هەركەسی پێی هەڵساوە دەستی خۆش بێت، بەڵام مەبەست لە بەستنی گۆنگرەی نەتەوەیی ئەوە نییە كە كۆنگرەیەك ببەسترێت و هەندێك هەڵمەتی میدیایی بۆ بكات و هەندێك خیتابات. پاشان هەركەس بچێتەوە ماڵی خۆی. مەبەستی سەرەكی ئێمە ئەوەیە ئێمە یەك پەیامی كوردی بە جیهان بگەینین، ئەوەش پەیامی ئاشتی، پەیامی برایەتی، پەیامی پێكەوە ژیان، پەیامی دەست هەڵنەگرتن لە مافەكانمان بەرێگای ئاشتی و بەرێگەی دیموكراتی، پەیامەكە بۆ ئەوەیە ئەوە نییە ئەو حزبە چۆن دەبێت یان پشگیری لەو حزبە بكات.

نەخێر ئەوە لە حزبەكان گەورەترە، بەهیچ شێوەیەك رێگە نادەین تاكە حزبێك ئەمە بۆ خۆی قۆرخ بكات، ئەمە كۆنگرەی نەتەوەیی هەموو كوردە. لێژنەی ئامادەكاری پێشی ئەوەی هەموو ئەوراقەكان ئامادە بكەن، ماوەیەكیان دانابوو، كە بە باوەڕی من ئەمە هەڵەیەك بوو كردیان، دەبوایە هەموو ئەو ئەوراقانە تەواو بكەن، ئینجا كاتێك دیاری بكەن، كاتێك كەوتنە گفتۆكۆ پێرانەگیشتن، بۆیە دواخرا، بەڵام ئەوە نە هەڵوەشاوەتەوە نە هەڵدەوەشێتەوە، بێگومان هەر دەبێت ئەو كۆنگرەیە ببەسترێت، بەڵام دەبێت لە كاتێكدا دا ببەسترێت، كە دەبێ سەدا سەد سەركەوتن بەدەست بهێنێت، شكست یا فەشەڵی ئەو كۆنگرەیە زەربەیەكی زۆر گەورە دەبێت بۆ گەلی كورد.‌ لە بەرئەوە چەند كاتی بوێ دەیدەینێ، بەڵام كە بەسترا دەبێت بە سەركەوتوویی تەواو ببێت. گفتوگۆیەكان بەردەوامە بۆ ئەوەی ئەو ئەوراقانە ئامادە بكەن و ئینشالڵا لە كاتێكی نزیكدا دێتە دەبەستن، بەڵام لە راستیدا تا ئەو ئەوراقانە تەواو نەبن نابێت وادەكەی پێشوەخت دیاری بكرێ.

چوونی من بۆ ئاماد، بەر لەوەی باسی ئەو سەفەرە بكەم، رووداوێكی دیكەتان بۆ دەگێرمەوە، ساڵی 1966 جەنابی بارزانی یاداشتێكی نووسی بۆ سكرتێری un لەسەر ئەو لە سێدارەدان و سووتاندنی گوندەكان و ئەو كارەساتانەی بەسەر گەلی كوردستاندا هاتووە، وێنەیەك لەو یاداشتەی بۆ سەرجەم ئەو مەلیك و سەرۆكانەی دنیا و هەر ئەوەی ناوی زاندرا بوایە بۆی رەوانە دەكرا، یەكێك لەوانە بۆ سەرۆك كۆماری توركیا، كە ئەوكات جەودەت سۆنای بوو، وێنەیەك لەو یادشتنامەیە بۆ ئەویش چوو.

نوێنەری شۆڕش لە بەرلین لەسەر نامەكە نووسرابوو كە ئەگەر وەڵام هەبێ بۆ ئەو ئەدرێسە بێتەوە، بەشێكیان وەڵامیان دایەوە كە یاداشتەكەیان بەدەست گەیشتووە، بەڵام جەودەت سۆنای قبوڵی نەكرد یاداشتنامەكە وەربگرێ و بە هەمان زەرف بۆ ئەدرێسەكەی بەرلینی ناردەوە، جلی كوردی قەدەغە بوو، زمان و هەبوونی كورد قەدەغە بوو، ئاڵای كوردستان كوفر بوو، هەرچی پەیوەندی بە كورد و كوردستانەوە بووە قەدەغە بووە و لە زیندان تا لە سێدارەدان سزای لەسەر بوو، ساڵی 1977 سلێمان دمیرێل سەرۆك وەزیران بوو هاتە دیار بەكر و لەوێ وابزانم ئەو ناوچەی كە ئەحكامی عورفی تێیدا باو بوو، بنكەكەی لە دیار بەكر بوو، لەوێ كۆبوونەوەی لەگەڵ سەرجەم دەزگا سەربازی و ئەمنیەكان كرد، كە چۆن رووبەرووی ئەو تێكۆشان و سەرهەڵدان ببنەوە، كە تازە لە باكووری كوردستان دەستی پێكرد بوو، ئەوانیش باسیان كرد كە فلانە حزب و فلانە كەس، ئەویش گوتی: نا نا گەنجێك پەیدا بووە هونەرمەندە و ناوی شڤان پەروەرە و ئەوەم بۆ بگرن، من هەقم بەوانی دیكە نییە. ئەمە سیاسەت و مامەڵەی دەوڵەتی توركیا بووە لەگەڵ كورد. ئۆزاڵ پیاوێك بوو خوا لێیخۆش بێ، من دوو تا سێ جار بینیومە، كە بە هەقیقەت پیاوێك بوو مێشكێكی كراوە و بە هەقیقەت بە نیاز بوو كێشەی كورد چارەسەر بكات، بە منی گوت : هەندێك ماددە لە دەستووری ئێمەدا هەیە كە من بە تەنیاش دەیخوێنمەوە بە راستی شەرم دەكەمەوە ئەوەندە شتی ناشرینە، بەڵام بۆتە فەرهەنگێك لەم وڵاتە و كاتی دەوێ تا ئێمە ئەو فەرهەنگە بگۆڕین، ئەگەر نا دەبێ كێشەی كورد چارەسەر بكرێ و كورد میللەتێكە و مافی خۆیەتی، بەڵام پێرانەگەیشت و نەشیتوانی و ئەو حزب و ئالیەتەشی نەبوو تا بتوانێ ئەو گۆڕانكارییانە بكات.

تا حزبی ئەكپارت هات، یەكەمجار پەیوەندی ئێمە زۆر خراپ بوو، رەنگە هەمووشتان لە بیرتان بێ هەندێجار گەیشتە ئاستی ئەوەی خەریك بوو شەڕ ببێ، بەڵام دوای ئەوەی، كە یەكترمان بینی و دانیشتن و دیالۆگ كرا دەركەوت ئەوان بە هەڵە لە ئێمە گەیشتوون و ئێمەش بە هەڵە لەوان گەیشتووین، تۆ كاتێك شەڕ دەكەی كە شەڕ لەسەر تۆ فەرز بكرێ و تەعەدا لەتۆ بكرێ و دانت پێدانەنرێ، شەڕ دەكەی بۆ خۆت بكە یان كە ناچار بووی شەڕ بكەی، شەڕەكە بۆ وڵات و بۆ گەلی خۆت بكە و شەڕ بۆ خەڵكی تر مەكە. بێگومان ئێمە هەموومان دەزانین لە كوردستانی باكوور كۆمەڵێك حزب هەیە و پەكەكەش چەند ساڵە شەڕی چەكداری دەكات و خەبات دەكات و ئەوانە هەمووی روونە، ئێمە لە هەندێك شت رەنگە هاوڕا بین و هەندێك شتیش بۆچوونمان وەك یەك نەبێت و ئەمەش مافێكی ئاسایی ئەوان و ئێمەشە، بەڵام لەسەر ئەوەی كورد مافی خاوەن مافی خۆیەتی و دەبێ بە مافی خۆی شاد ببێ ئێمە لەسەر ئەوە ناكۆكیمان لەگەڵ هیچ كەس نییە، بەڵام كێشەكە ئەوە بوو كە ئێمە لە كوێ رابەرێكی دەوڵەتی توركیا بدۆزینەوە كە ئەو راستییانە قبووڵ بكات، كە بەڵێ میللەتی كورد هەیەو ئامادە بێت كێشەی كورد چارەسەر بكات، تا گەیشتە ئەوەی رۆژێك سەرۆك وەزیران ئۆردوگان هاتە دیار بەكر لەوێ وتارێكی پێشكەش كرد و گوتی: بەلێ گەلی كورد هەیەو كێشەی كوردیش هەیە و دەبێ بە ئاشتی چارەسەر بكرێ.

ئەمەش یەكەمجار بوو كە قسەیەكی وا بكرێ، كە ئەم قسەیەی كرد من پەیامێكم بۆی نارد و گوتم: من زۆر ئومێدەوارم بەو قسەیە و ئەمە بۆ توركیا قسەیەكی گەورەیە و ئومێدەوارم بەردەوام بی لەسەری و ئەگەر وا بێت بەرەو چارەسەری ئاشتی بچی ئێمە ئامادەین هەرچی لە دەستمان بێت بیكەین و لەگەڵ لایەنەكانی دیكەی كوردی و بە تایبەتیش لەگەڵ پەكەكە قسەمان كرد، كە ئەمە دەرفەتێكە.

ئەگەر فیعلەن دەرفەتی ئاشتی هاتە پێش دەبێ هەموو كورد پێشتوازی لێبكات، ئەوە بوو ئەردۆگان هاتە هەولێر و لە هەولێریش دیسان گوتی: ئەوە رۆژەی ئینكاری هەبوونی كورد دەكرا ئەو رۆژە رۆیشت، من دیسان پێم گوت: من ئەوە بە شۆڕشێك دەزانم و ئەگەر تۆ لەسەر ئەم شێوازە بەردەوام بیت بەڵێن بێت هەرچی لە تواناماندا بێت پشتیوانیت لێ بكەین بۆ چارەسەری ئاشتیانە بۆ كێشەی كورد و بە كردەوەش گەیشتە ئەوەی گفتوگۆ دەستی پێكرد. رەنگە ئەو هەنگاوانە ئەگەر تۆ بەراوردی بكەی لەگەڵ باشووری كوردستان هەیە كەم بێت یان سست بێت، بەڵام تۆ لە چ فەرهەنێگ دای و لە كوێی؟ بۆ توركیا یەكجار زۆرە و بڕیار بە دەستی عەسكەر و كەمالیستەكان بوو هەر تەنیا ئەوە كە بڕیار لە دەستی ئەوان دەرچوو رەنگە بۆ خاتری كورد نەبێ،بەڵام پێش هەموو كەس لەبەرژەوەندی كوردە، ئیتر ئەوە بوو كە لێكگەیشتین بەوەی كە ئێمە هەڕەشە نین لەسەر ئێوەو ئێمە دەتوانین هاوكار دەبین بۆ چارەسەری كێشەكانی ئێوە، نەك تەنیا بۆ كێشەی كوردی باكوور،بەڵكو ئێمە هاوكار دەبین بۆ چارەسەركردنی كێشەی ئابووری خۆشتان و بە كردەوەش پەیوەندی ئابووری نێوان هەرێمی كوردستان و توركیا زۆر یارمەتی ئابووری توركیای دا.

ئێمەش سوودمان بینی، بە دڵنیایەوە دنیاش بەرژەوەندییە و نابێ تەنیا چاوەڕوانی ئەوە بكەین توركیا یان غەیری توركیا و هەر دەوڵەتێك چیمان بوێ بۆمان بكات و خۆشی هیچ سوود نەكات، لە دنیادا شتی وا نییە، بەڵام تۆ دەبێ لێكی بدەیتەوە بەوەی چەند قازانجی تۆیە و چەند قازانجی تۆ نییە. بە بۆچوونی من مادەمەكی دەرگای دیالۆگ كرایەوە و كەسێك پەیدا بوو بڵێ ئەو رۆژە نەما كە ئینكاری كورد بكرێ، من دەڵێم ئەوە دەستكەوتێكی یەكجار گەورەیە و گۆڕانێكی گەورەیە بەسەر سیاسەتی توركیا دا هاتووە. بێگومان هەندێك جار هەڕەشە دەكرێ و پرۆسەی ئاشتی بەم شێوەیە، ئەمە هەمووی هەڵەیە، بە بۆچوونی ئێمە پرۆسەی ئاشتی لە بەرژەوەندی كورد دایە و دەبێت بەردەوام بێت و هەروەها دەبێ كاتیشی بدەنێ، نابێت بڵێن چۆن بارودۆخێك لە باشوور دروست بووە دەبێت هەمان شت لە توركیا دروست ببێت لە ماوەی ساڵێكدا، رەنگە لە ماوەی 10 ساڵی داهاتوودا ئەوەی لە توركیا دروست دەبێ زۆر لە ئێمە تێپەڕ ببێ، بەڵام بەو بیركردنەوە تەسكەیە نابێ، بەر لە ماوەیەك داوەتێك هات گوتیان 300 گەنجی كوڕو كچی كورد لە دیار بەكر ئاهەنگی هاوسەرگیری دەكەن و حەز دەكەیت تۆش تێیدا بەشدار بی، گوتم ولڵا منیش پێمخۆشەو بۆنەیەكی وا و 300 گەنجی كورد هاوسەرگیری بكەن، منیش دێم و پیرۆزبایشیان لێدەكەم و پێمخۆشە، گوتیشم رەنگە چوونی من بۆ ئاماد وەك هاندەرێك دەبێت.

كاتێكیش چووینە ئەوێ حەزیان دەكرد شڤان پەروەریش بچێت. لە راستیدا شڤان نەدەچوو، پێم گوت وەرە لەگەڵ من وەرە و كاتێكیش چووینە ئەوێ دەبینم دۆخێكی ترە، بەڵێ ئەو بەرنامەیە هەبوو كە 300 گەنجی كورد هاوسەرگیری دەكەن و هەتا ئێمە چوینە ئەوێ ببووە 380 گەنج، گوتم نەمزانی ئەگەر نا منیش 200 تا 300 گەنجی خۆشمان دەهێنا، كۆبونەوەیەكی زۆر گەورە بوو و سەیر دەكەم ئاڵای كوردستان هەڵدراوەو هوتافێكی گەورە هەبوو لە توركیا، هەندێك جار مرۆڤ دەیگوت ئەمە خەونە یان راستیە، هەموو بە جلوبەرگی كوردی و ئاڵای كوردستان، ئێوەش گوێتان لێبوو كە ئەردۆگان وتارێكی چۆنی پێشكەش كرد. ئەمانە هەمووی گۆڕانگاری زۆر گەورەن و دەستكەوتێكی گەورەیە بۆ كورد، بۆ یەكەمجارە ئەوان ناوی كوردستان بهێنن و ئاڵای كوردستان. ئەگەر پێشتر بە نهێنیش لە جانتای كەسێكیان دەرهێنابوایە، رەنگە هەلیانبواسیبوایە، پاشان هونەرمەند شڤان پەروەر و ئیبراهیم تاتلسیس بێن و سروودی پێشمەرگە بلێن لەبەردەم ئەو هەموو خەڵكە، ولڵاهی شتێكی زۆر گەورەیە، راستە بۆ باشووری كوردستان شتێكی زۆر ئاساییە، بەڵام بۆ توركیا زۆر شتێكی گەورە بوو. ئەمە هەنگاوی دیكەی بە دواوەیە، مافی كوردیش تەنیا ئەوە نییە هونەرمەندێك بێت سروود بڵێ و تەواو، مافی كورد خوێندنە و داننانە بە هەبوون و زمانی خۆی و ئیدارەی خۆی بكات و باوەڕی تەواویشم هەیە ئەمانە هەمووی بە دەست دێت ئەگەر عاقڵانە رەفتار لەگەڵ ئەو بارودۆخە بكرێ و ئومێدەواریشم عاقڵانە مامەڵەی لەگەڵدا بكرێ.

پاشان سەردانی شارەوانی ئامەدمان كرد، لەوێش هەموو حزبەكان ئامادە بوون، ئەوەی من لە ئامادەم بینی لە هیچ شوێنێكی دنیام نەبینیوە ئەو پێشوازییە، هەتا منداڵەكان، ئەوەش نەبوو بڵێی قوتابخانەیەكیان هێناوە، منداڵ لە كوچە و كۆلانەكان دەهاتن ئاڵای كوردستانیان بەدەستەوە بوو. ئەو ساتە بیرمكردەوە لەو ساڵەی بومەتە پێشمەرگە و خەباتم كردووە هەمووی بۆ ئەو ساتە بوو كە مرۆڤ جارێكی وا بێتە ناو میللەتی خۆی بەم شێوەیە پێشوازی لێبكرێ و بەو سەربەرزییە، ئەمە هەموو دنیایە، لەوێ لەگەڵ هەموو حزبەكانیش قسەم كرد و گوتم برایانم ئێمە هەمووی برای یەكترین و ئێمە دەمانەوێ ئێوە سەركەون و بە مافی خۆتان شاد ببن، منیش ئارەزووم دەكرد ئەردۆگان ئەمڕۆ بیگوتابوایە بڕیارماندا ئێمە دان بە مافی میللەتی كورد دەنێین و دەبێ كوردستان ببێتە هەرێمێكی فیدراڵی، رەنگە ئەگەر بیەوێ ئەوەش بڵێ ئێستا ناتوانێ ئەوە بڵێ، ئێوە شتی گەورەتان دەست كەوتووە و تكاتان لێ دەكەم سەبرتان هەبێت و ئێمە لەگەڵتانین و ئێمە لەگەڵ مافی ئێوەین و دەرگاتان بۆ كراوەتەوە ئەو دەرگایە دانەخەن، چونكە ئەمە دەستكەوتێكی گەورەیە و توركیا بەم شێوەیە بێتە پێش ئێمە ئەوەمان لە خودای گەورە دەویست، ئەوانیش لە راستیدا هاوڕا بوون و پاشان داوەتێكیان رێكخست و نزیكەی 600 تا 700 كەسایەتی كورد لە حزبەكان و كەسایەتی سەربەخۆ و رۆشنبیرو نووسەریان بانگێشت كرد بوو، نەمبینی یەكێك نارەزایی بێت بە پێچەوانەوە، جاران كە بە رێگایەدا دەچوو مرۆڤ بە ترسەوە نەدەوێرا بە كوردی قسە بكات، لە ساڵانی پێشوودا بەرپرسێكی گەورە كاتێك لە فەرمانگەی خۆی بوو نەدەوێرا بە كوردی قسە بكات بەڵكو بە ئینگلیزی قسەی لەگەڵ كردم و كاتێكیش هاتینە دەرەوەی فەرمانگەكە بە كوردی پێی گوتم بە خێر هاتی سەر سەرێ من لەژوورەكەی خۆشی نەدەوێرا بە كوردی قسە بكات، لە بەر ئەوە ئەو كەشەی من لەوێ بینیم لە راستیدا مێژووێكی تازەیە، هەروەها رۆژێك و دەرفەتێكی تازەیە لەوێ و ئینشالڵا خێردار دەبێ و لەوێش گوتم بۆ سەركەوتنی ئاشتی هەرچی لە دەست ئێمەدا بێت بۆتانی دەكەین، كاتێكیش هاتینەوە و گەیشتینە سلۆپی بە ئەستەم خۆمان رزگار كرد و خەریك بوو نەهێڵن بگەڕێینەوە، پێشوازییەكی وایان كرد لە راستیدا سەبارەت بە من ئەمە هەموو شتێكە لە دنیا، كاتێك مرۆڤ بەم شێوەیە لە ناو میللەتی خۆی پێشوازی لێ بكرێ ئەمەیە ژیان.

سەبارەت بە رۆژئاوای كوردستانیش، هەر لەم هۆڵەدا لەگەڵ سەرجەم حزب و كەسایەتی برایانمان لە رۆژئاوای كوردستان كۆبووینەوە لە كۆتاییەكانی ساڵی 2011، پێم گوتن براینە ئەمە دەرفەتێكە بۆتان هاتۆتە پێش، بەڵام ئێوە بە دوای عاتیفە نەكەون و دووچاری تەقدیرانی هەڵە نەبن و جارێ روون نییە دۆخەكە چی لێدێت، یەكەم ناوچەی ئێوە لەرووی جوگرافیەوە پچڕ پچڕە و لەسەر یەكتر نییە. دووەم: ناوچەی ئێوە ناوچەیەكی شاخاوی نییە بڵێن ئەگەر بوو بە شەڕ بتوانن بەرگری بكەن. سێیەم: رەنگە ئەو ئەزموونەشتان نەبێت لە ئێستادا، جارێ دۆخی ئێوە بەم شێوەیە نییەو لە سەرەتادا لە نێو خۆتاندا دەستەیەك پێكبهێنن كە نوێنەرایەتی هەمووتان بكات و ئێوە پێكەوە بن و ئەمەش مەرجە، ئێمە ئامادەین هەموو پشتیوانییەكتان بكەین. لەو كۆبوونەوەیەدا دوو لایەن دژی وەستان كە بریتی بوون لە مەهەپە و پەیەدە، گوتم باشە ئێوە شەرم ناكەن لەگەڵ مەهەپە دەبنە یەك، پاشان ئەوانیش هاتن و لە رۆژی 11ی تەمووزی ساڵی پار دیسان زنجیرەیەك كۆبوونەوە دەستەی باڵا پێكهێندرا، كە هەموویان بە یەكەوە بن. ئێمەش گوتمان باشە ئێوە بە یەكەوە بن و نەچن خۆتان پێویستی هیچ حكوومەتێك مەكەن و چیتان دەوێ من دەتاندەمێ، ئاسانیش نەبوو ئێمە بتوانین سنووریان بۆ بكەینەوە، بە پێی بڕیاری ئەنجوومەنی ئاسایش سزا لەسەر سووریایە تا چەند هەوڵدانێك تا توانیمان تەنیا یاساییانە دووچاری هیچ بەرپرسیارێتیەك نەبین سنووریان بۆ بكەینەوە، بەوانمان گوت ئێوە ئەگەر لێتان قەوماوە بێن وڵاتی خۆتانەو ئێوە ئاوارە نین، بەڵكو ئێوە ماڵی خۆتانە، بەڵام ئەگەر لە بەر بارودۆخی ژیان بێت ئێوە نەیێن. ئێمە ئەو كۆمەكانەتان بۆ دەنێرین و وڵاتی خۆتان بەجێمەهێلن، بەڵام ئەگەر شەڕ كەوتە ناوچەی ئێوە و ناچار كران ئەوە شتێكی ترە، من بە نیاز بووم شتێكی وایان بۆ بكەین تا دانپێنانێكی نێودەوڵەتیشیان بۆ بەدەست بهێنین و ئامادەش بوون، لەرووسیا لەگەڵ پۆتینی سەرۆكی رووسیا و لەگەڵ ئۆباما سەرۆكی ئەمریكا و لەگەڵ هۆلان سەرۆكی فڕەنسا لە پاریس قسەم كردو گوتیان زۆر باشە، بەڵام لە چوار چێوەی سووریاو ئەو جۆرە شتانە بێت، گوتم خۆ ئەوان نەیان گووتوە لە سووریا جیا دەبینەوە، ئەوانە هەتا ناسنامەیان نییە و هاووڵاتی نین،

كاتێكیش بە ئێمە دەڵێن ئەوانە بێنە ناو ئۆپۆزسیۆن ئێ خۆ دەبێ ئۆپۆزسیۆنیش هەنگاو بێتە پێشەوە، خەریك بوو داننانێكی ناودەوڵەتیان بۆ بەدەست بێنم، من خەریك بوو پشتیوانیان بۆ پەیدا بكەین، من كاتێك لەگەڵ سەرۆكی ئەمریكا و فەڕەنسا و رووسیا پشتیوانیان لێدەكەین و هەموو سەركردەكانی دنیا بۆ ئەوەی پێگەیەكیان بۆ دروست بكەین كەچی دەڵێن پیلانمان لەدژ دەگێرن، ترسی ئێمە ئەوەیە چۆن ئێمە باوەڕ بەو هەموو خەڵكە بكەین كورد لەگەڵ رژێم نییە و بەشێك نییە لە رژێم، ئێستا كە رژێم هاتۆتە ئەو ناوچەیە و وێنەكانی عەبدوڵا ئۆجەلان و ئاڵای خۆیان و لە بنەڕەتدا هەر بەرزكردنەوەی ئاڵای كوردستان هەر قەدەغە بووە پێیان دابەزاندوون و وێنەی بەشار ئەسەد و ئاڵای سووریایان لەو ناوچانە بەرز كردۆتەوە.

مرۆڤ لە هەموو بۆنەیەكدا دەبێت بڵێن هەزار سڵاو لە گیانی پاكی شەهیدانی كوردو كوردستان، هەر شاد و سەركەوتوو بن